Product details

ඇම්.ඩී.අතුලවංශ මහතා විසින් රූත් ප්‍රවාර් ජබ්බාලාගේ Heat and Dust නමැති කෘතියේ සිංහල පරිවර්තනයක් බිහි කිරීම ඛෙහෙවින් කාලෝචිත ය. මීට කලකට උඩ දී ලන්ඩන් නගරයේ පරණ පොත් සාප්පුවකට ගිය මට මේ ඉංග්‍රීසි කෘතිය මිල දී ගැනීමට හැකි වීම එකල මම භාග්‍යයක් කොට සැලකුවෙමි. ඊට හේතු වූයේ මේ කතුවරිය මේ පොත ලියා ඇති ආකාරයත් එහි අන්තර්ගත අනුභූතිනුත් මා සිත ඇලළූ බැවිනි. ජවාලා කතුවරිය කියා පාන්නේ සංස්කෘතීන් දෙකක චින්තනය හා ආකල්ප පිළිබඳ වෘත්තාන්තයකි. ඒ වෘත්තාන්තය සන්නිවේදනය කරනු සඳහා නව ආකෘතියක් ද අනුගමනය කර ඇති බව මම හඳුනා ගතිමි. භාරත දේශයේ ජනතාව හා ගැවසෙමින් ඒ පැවැත්මේ ආකූල ව්‍යාකූල භාවයන් සහ දුක් දොම්නස් දින සටහන් පෙළක් සේ ලිවීමෙන් ගත් කතුවරිය සම්මත ලේඛන රටාව වෙනස් මගකට යොමු කළ බවක් මට හැඟිණ. මම ඇගේ මානව අත්දැකීමේ කොටස්කරුවකු බවට පත් වුණෙමි. ඇතැම් විටෙක මගේ හදවත කම්පනය වන්නට විය. මේ තදාත්මකරණය සහෘද සිංහල පාඨකයා ද කිසියම් දිනෙක විඳිනු ඇතැයි යන සිතුවේල්ල මා තුළ ඇඳී තිබිණ. අද එය මෙසේ අපූර්ව දේශය නමින් සිංහලට නගා තිබීමෙන් අන්තර් සංස්කෘතික අධ්‍යයනය හා බැඳුණු කතා කලාව පෝෂණය වනු නොඅනුමාන ය. පේරාදෙණිය විශ්වවිද්‍යාලයෙන් ශාස්ත්‍රවේදී (බී.ඒ.) උපාධිය ද පාලි හා බෞද්ධ විශ්වවිද්‍යාලයෙන් ශාස්ත්‍රපති (ඇම්.ඒ.) උපාධිය ද ලද අතුලවංශ මහතා ශ්‍රී ලංකා රාජ්‍ය ඉංජිනේරු සංස්ථාවේ සහකාර පිරිස් කළමනාකාර සහ නියෝජ්‍ය සාමාන්‍යාධිකාරී (මානව සම්පත් හා පාලන) වැ.බ. ලෙස සේවයේ යෙදී සිට විශ්‍රාම ලැබී ය. සිංහල පාඨකයන් වෙනුවෙන් ඔහු කර ඇති මේ සත්කාර්යය බෙහෙවින් ප්‍රශංසනීය වේ.